مشہورغزلیں/میرا انتخاب

ہم جنگل کے جوگی ہم کو ایک جگہ آرام کہاں
آج یہاں کل اور نگر میں صبح کہاں‌اور شام کہاں

ہم سے بھی پیت کی بات کرو کچھ، ہم سے بھی لوگو پیار کرو
تم تو پشیمان ہو بھی سکو گے ہم کو یہاں پہ دوام کہاں

سانجھ سمے کچھ تارے نکلے پل بھر چمکے ڈوب گئے
انبر ابنر ڈھونڈ رہا ہے اب انہیں ماہ تمام کہاں

دل پہ جو بیتے سہ لیتے ہیں اپنی زباں میں‌کہ لیتے ہیں
انشاء جی ہم لوگ کہاں اور میر کا رنگ کلام کہاں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رازِ الفت چھپا کے دیکھ لیا
دل بہت کچھ جلا کے دیکھ لیا

اور کیا دیکھنے کو باقی ہے
آپ سے دل لگا کے دیکھ لیا

آس اُس در سے ٹوٹتی ہی نہیں
جا کے دیکھا ، نہ جا کے دیکھ لیا

وہ مرے ہو کے بھی مرے نہ ہوئے
ان کو اپنا بنا کے دیکھ لیا

آج اُن کی نظر میں کچھ ہم نے
سب کی نظریں بچا کے دیکھ لیا

فیض تکمیلِ غم بھی ہو نہ سکی
عشق کو آزما کے دیکھ لیا
……………………………………………

اس کو کہتے ہیں اچانک ہوش میں آنے کا نام
رکھ دیا دانش کدہ، رندوں نے میخانے کا نام

حُور ھے، رعنائیِ نسواں کا اک نقلی لباس
خلد ھے، زاہد کے دانستہ بہک جانے کا نام

آپ پر بھی وار ہو دل کا، تو پوچھیں آپ سے
عشق بیماری کا غلبہ ھے کہ افسانے کا نام

بے رُخی کیا ھے؟ لگاوٹ تیز کرنے کا عمل
دلبری کیا ھے؟ مکمل طوق پہنانے کا نام

زندگی ھے، دوسروں کے حکم پر مرنے کا جشن
موت ھے، اپنی رضامندی سے مر جانے کا نام

آگہی کیا ھے؟ مسلسل خود فریبی کا چلن
روشنی کیا ھے؟ فریبِ مستقل کھانے کا نام

ہیں عدم کے ذکر پر، کیوں آپ اتنے پُر غضب
شمع کے ہمراہ، آ جاتا ھے پروانے کا نام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بات کب عشق کی ہونٹوں سے بیاں ہوتی ہے
عشق ہوتا ہے تو آنکھوں میں زباں ہوتی ہے
بولتے رہتے ہیں جب ‘ کچھ بھی نہیں کہہ پاتے
بات جب بنتی ہے تب بات کہاں ہوتی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شور ہے ہر طرف سحاب سحاب
ساقیا! ساقیا! شراب! شراب

آبِ حیواں کو مَے سے کیا نسبت!
پانی پانی ہے اور شراب شراب!

رند بخشے گئے قیامت میں
شیخ کہتا رہا حساب حساب

اک وہی مستِ با خبر نکلا
جس کو کہتے تھے سب خراب خراب

مجھ سے وجہِ گناہ جب پوچھی
سر جھکا کے کہا شباب شباب

جام گرنے لگا، تو بہکا شیخ
تھامنا ! تھامنا! کتاب! کتاب!

کب وہ آتا ہے سامنے کشفی
جس کی ہر اک ادا حجاب حجاب

(کشفی ملتانی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہجر کرتے یا کوئی وصل گزارا کرتے

ہم بہرحال بسر خواب تمھارا کرتے

ایک ایسی بھی گھڑی عشق میں آئی تھی کہ ہم

خاک کو ہاتھ لگاتے تو ستارا کرتے

اب تو مل جاؤ ہمیں تم کہ تمھاری خاطر

اتنی دور آ گئے دنیا سے کنارا کرتے

محوِ آرائشِ رُخ ہے وہ قیامت سرِ بام

آنکھ اگر آئینہ ہوتی تو نظارا کرتے

ایک چہرے میں تو ممکن نہیں اتنے چہرے

کس سے کرتے جو کوئی عشق دوبارا کرتے

جب ہے یہ خانہ ء دل آپکی خلوت کے لئے

پھر کوئی آئے یہاں ، کیسے گوارا کرتے

کون رکھتا ہے اندھیرے میں دیا آنکھ میں خواب

تیری جانب ہی ترے لوگ اشارا کرتے

ظرفِ آئینہ کہاں اور ترا حسن کہاں

ہم ترے چہرے سے آئینہ سنوارا کرتے

(عبید اللہ علیم)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شبیر حسن خان جوش ملیح آبادی

سوزِ غم دے کے مجھے اس نے یہ ارشاد کیا
جا تجھے کشمکشِ دہر سے آزاد کیا

وە کریں بھی تو کن الفاظ میں تیرا شکوە
جن کو تیری نگہِ لطف نے برباد کیا

دل کی چوٹوں نے کبھی چین سے سونے نہ دیا
جب چلی سرد ہوا میں نے تجھے یاد کیا

اسکا رونا نہیں کیوں تم نے کیا دل برباد
اسکا غم ہے کہ بہت دیر میں برباد کیا

اتنا معصوم ہوں فطرت سے کلی جب چٹکی
جھک کے میں نے کہا مجھ سے کچھ ارشاد کیا ؟

میری ہر سانس ہے اس بات کی شاھد اے موت
میں نے ہر لطف کے موقعہ پہ تجھے یاد کیا

مجھکو تو ہوش نہیں تجھ کو خبر ہو شاید
لوگ کہتے ہیں کہ تو نے مجھے برباد کیا

وە تجھے یاد کرے جس نے بھلایا ہو تجھے
ہم نے تجھ کو بھلایا نہ کبھی یاد کیا

کچھ نہیں اس کے سوا جوش حریفوں کا کلام
وصل نے شاد کیا ہجر نے ناشاد کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہر پری وَش کو خدا تسلیم کر لیتا ہوں میں
کتنا سودائی ہوں، کیا تسلیم کر لیتا ہوں میں

مے چُھٹی، پر گاہے گاہے اب بھی بہرِ احترام
دعوتِ آب و ہوا تسلیم کر لیتا ہوں میں

بے وفا میں نے، محبّت سے کہا تھا آپ کو
لیجیئے اب با وفا تسلیم کر لیتا ہوں میں

جو اندھیرا تیری زلفوں کی طرح شاداب ہو
اُس اندھیرے کو ضیا تسلیم کر لیتا ہوں میں

جُرم تو کوئی نہیں سرزد ہوا مجھ سے حضور
با وجود اِس کے سزا تسلیم کر لیتا ہوں میں

جب بغیر اس کے نہ ہوتی ہو خلاصی اے عدم
رہزنوں کو رہنما تسلیم کر لیتا ہوں میں
۔ ۔ ۔ ۔ ۔ ۔ ۔ ۔ ۔ ۔ ۔۔ ۔۔۔۔۔۔ ۔۔ ۔ ۔ ۔ ۔ ۔۔ ۔ ۔
اتنا تو دوستی کا صلہ دیجئے مجھے
اپنا سمجھ کے زہر پلا دیجئے مجھے

اٹھے نہ تا کہ آپ کی جانب نظر کوئی
جتنی بھی تہمتیں ہیں لگا دیجئے مجھے

کیوں آپ کی خوشی کو مرا غم کرے اداس
اک تلخ حادثہ ہوں بھلا دیجئے مجھے

صدق و صفا نے مجھ کو کیا ہے بہت خراب
مکر و ریا ضرور سکھا دیجئے مجھے

میں آپ کے قریب ہی ہوتا ہوں ہر گھڑی
موقع کبھی پڑے تو صدا دیجئے مجھے

ہر چیز دستیاب ہے بازار میں عدم
جھوٹی خوشی خرید کے لا دیجئے مجھے
۔ ۔ ۔ ۔ ۔ ۔ ۔ ۔ ۔ ۔ ۔۔ ۔۔۔۔۔۔ ۔۔ ۔ ۔ ۔ ۔ ۔۔ ۔ ۔

جو تیرے فقیر ہوتے ہیں
آدمی بے نظیر ہوتے ہیں

تیری محفل میں بیٹھنے والے
کتنے روشن ضمیر ہوتے ہیں

پھول دامن میں چند رکھ لیجئے
راستے میں فقیر ہوتے ہیں

زندگی کے حسین ترکش میں
کتنے بے رحم تیر ہوتے ہیں

وہ پرندے جو آنکھ رکھتے ہیں
سب سے پہلے اسیر ہوتے ہیں

اے عدم احتیاط لوگوں سے
لوگ منکر نکیر ہوتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کیوں جل گیا نہ، تابِ رخِ یار دیکھ کر
جلتا ہوں اپنی طاقتِ دیدار دیکھ کر

آتش پرست کہتے ہیں اہلِ جہاں مجھے
سرگرمِ نالہ ہاۓ شرربار دیکھ کر

کیا آبروۓ عشق، جہاں عام ہو جفا
رکتا ہوں تم کو بے سبب آزار دیکھ کر

آتا ہے میرے قتل کو پَر جوشِ رشک سے
مرتا ہوں اس کے ہاتھ میں تلوار دیکھ کر

ثابت ہوا ہے گردنِ مینا پہ خونِ خلق
لرزے ہے موجِ مے تری رفتار دیکھ کر

وا حسرتا کہ یار نے کھینچا ستم سے ہاتھ
ہم کو حریصِ لذّتِ آزار دیکھ کر

بِک جاتے ہیں ہم آپ، متاعِ سخن کے ساتھ
لیکن عیارِ طبعِ خریدار دیکھ کر

زُنّار باندھ، سبحۂ صد دانہ توڑ ڈال
رہرو چلے ہے راہ کو ہموار دیکھ کر

ان آبلوں سے پاؤں کے گھبرا گیا تھا میں
جی خوش ہوا ہے راہ کو پُر خار دیکھ کر

کیا بد گماں ہے مجھ سے، کہ آئینے میں مرے
طوطی کا عکس سمجھے ہے زنگار دیکھ کر

گرنی تھی ہم پہ برقِ تجلّی، نہ طو ر پر
دیتے ہیں بادہ’ ظرفِ قدح خوار’ دیکھ کر

سر پھوڑنا وہ! ‘غالبؔ شوریدہ حال’ کا
یاد آگیا مجھے تری دیوار دیکھ کر
……………………………………..

دن گزر جاینگے سرکار کوئی بات نہیں
زخم بھر جاینگے سرکار کوئی بات نہیں

آپ کا شہر اگر بار سمجھتا ہے ہمیں
کوچ کر جاینگے سرکار کوئی بات نہیں

آپ کے جور کا جب ذکر چھڑا محشر میں
ہم مکر جاینگے ، سرکار کوئی بات نہیں

رو کے جینے میں بھلا کون سی شیرینی ہے
ہنس کے مر جاینگے سرکار کوئی بات نہیں

نکل آئے ہیں عدم سے تو ججھکنا کیسا
در بدر جاینگے سرکار کوئی بات نہیں

عبدالحمید عدم

……….

یار کو ہم نے جا بجا دیکھا
کہیں ظاہر کہیں چھپا دیکھا

کہیں ممکن ہوا کہیں واجب
کہیں فانی کہیں بقا دیکھا

دید اپنے کی تھی اسے خواہش
آپ کو ہر طرح بنا دیکھا

صورتِ گُل میں کھل کھلا کے ہنسا
شکل بلبل میں چہچہا دیکھا

شمع ہو کر کے اور پروانہ
آپ کو آپ میں جلا دیکھا

کر کے دعویٰ کہیں انالحق کا
بر سرِ دار وہ کھنچا دیکھا

تھا وہ برتر شما و ما سے نیاز
پھر وہی اب شما و ما دیکھا

کہیں ہے بادشاہ تخت نشیں
کہیں کاسہ لئے گدا دیکھا

کہیں عابد بنا کہیں زاہد
کہیں رندوں کا پیشوا دیکھا

کہیں وہ در لباسِ معشوقاں
بر سرِ ناز اور ادا دیکھا

کہیں عاشق نیاز کی صورت
سینہ بریاں و دل جلا دیکھا

نیاز بریلوی

………………………..

کچهـ اس ادا سے آج وه پہلو نشیں رہے
جب تک ہمارے پاس رہے، ہم نہیں رہے

یا رب کسی کی راز محبت کی خیر ہو
دست جنوں رہے نه رہے، آستیں رہے

درد غــم فـــراق کے یه سخت مــرحلیں
حیراں ہوں میں که پهر بهی تم اتنے حسیں رہے

جا اور کوئی ضبط کی دنیا تلاش کر
اے عشق ہم تو اب تیرے قابل نہیں رہے

الله رے چشم یار کے موجز بیانیاں
ہر ایک کا ہے گمان که مخاطب ہمیں رہے

اس عشق کے تلافی مافات دیکهنا
رونے کے حسرتیں ہیں جب آنسو نہیں رہے

ایمان و کفر اور نه دنیا و دین رہے
اے عشق شادباش که تنها ہمیں رہے

شاعر : جگر مرادآبادی

……………………………

اس نہیں کا کوئ علاج نہیں
روز کہتے ہیں آپ آج نہیں
کل جو تها آج وہ مزاج نہیں
اس تلوان کا کچھ علاج نہیں
کهوٹے داموں میں یہ بھی کیا ٹهرا
در ہم داغ کا رواج نہیں
دل لگی کیجئے رقیبوں سے
اس طرح کا مرا مزاج نہیں
عشق ہے بادشاہ عالم گیر
گر چہ ظاہر میں تخت و تاج نہیں
حور سے پوچھتا ہوں جنت میں
اس جگہ کیا بتوں کا راج نہیں
صبر بھی دل کو داغ دے لیں گے
ابھی کچھ اس کی احتیاج نہیں
داغ دہلوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نظر نظر بیقرار سی ہے نفس نفس میں شرار سا ہے
میں جا نتا ہوں کہ تم نہ آؤگے پھر بھی کچھ انتظار سا ہے

مرے عزیزو! میرے رفیقو! چلو کوئی داستان چھیڑو
غم زمانہ کی بات چھوڑو یہ غم تو اب سازگار سا ہے

وہی فسر دہ سا رنگ محفل وہی ترا ایک عام جلوہ
مری نگاہوں میں بار سا تھا مری نگا ہوں میں بار سا ہے

کبھی تو آؤ ! کبھی تو بیٹھو! کبھی تو دیکھو! کبھی تو پوچھو
تمہاری بستی میں ہم فقیروں کا حال کیوں سوگوار سا ہے

چلو کہ جشن بہار دیکھیں چلو کہ ظرف بہار جا نچیں
چمن چمن روشنی ہوئی ہے کلی کلی پہ نکھار سا ہے

یہ زلف بر دوش کون آیا یہ کس کی آہٹ سے گل کھلے ہیں
مہک رہی ہے فضائے ہستی تمام عالم بہار سا ہے

شاعر : ساغر صدیقی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تجھی سے ابتدا ہے، تو ہی اک دن انتہا ہوگا
صدائے ساز ہوگی اور نہ ساز بے صدا ہوگا

ہمیں‌ معلوم ہے، ہم سے سنو محشر میں‌کیا ہوگا
سب اس کو دیکھتے ہوں‌گے، وہ ہم کو دیکھتا ہوگا

سرمحشر ہم ایسے عاصیوں کا اور کیا ہوگا
درِجنت نہ وا ہوگا، درِ رحمت تو وا ہوگا

جہنم ہو کہ جنت ، جو بھی ہوگا فیصلہ ہوگا
یہ کیا کم ہے ہمارا اور اُن کا سامنا ہوگا

ازل ہو یا ابد دونوں اسیر زلف حضرت ہیں
جدھر نظریں‌اُٹھاؤ گے، یہی اک سلسلہ ہوگا

یہ نسبت عشق کی بے رنگ لائے رہ نہیں‌سکتی
جو محبوب خدا ہوگا، وہ محبوبِ خدا ہوگا

اسی امید پر ہم طالبان درد جیتے ہیں
خوشا دردے کہ تیرا درد، در د ِ لا دوا ہوگا

نگاہِ قہر پر بھی جان و دل سب کھوئے بیٹھا ہے
نگاہِ مہر ِ عاشق پر اگر ہوگی تو کیا ہوگا

یہ مانا بھیج دے گا ہم کو محشر سے جہنم میں
مگر جو دل پہ گذرے گی، وہ دل ہی جانتا ہوگا

سمجھتا کیا ہے تو دیوانگاہِ عشق کو زاہد؟
یہ ہو جائیں گی جس جانب، اسی جانب خدا ہوگا

جگر کا ہاتھ ہوگا حشر میں اور دامنِ حضرت
شکایت ہوگا، شکوہ جو بھی ہوگا، برملا ہوگا

شاعر : جگر مرادآبادی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہاتھ دیا اس نے مِرے ہاتھ میں
میں تو ولی بن گیا اِک رات میں

عشق کرو گے تو کماؤ گے نام
تُہمتیں بٹتی نہیں خیرات میں

عشق بُری شے سہی پر دوستو
دخل نہ دو تم مری ہر بات میں

مجھ پہ توجہ ہے سب آفات کی
کوئی کشش تو ہے مری ذات میں

راہنما تھا مرا اِک سامری
کھو گیا میں شہر طلِسمات میں

مجھ کو لگا عام سا اِک آدمی
آیا وہ جب کام کے اوقات میں

شام کی گلرنگ ہوا کیا چلی
درد مہکنے لگا جذبات میں

ہاتھ میں کاغذ کی لیے چھتریاں
گھر سے نہ نکلا کرو برسات میں

ربط بڑھایا نہ قتیل اس لیے
فرق تھا دونوں کے خیالات میں
…………………………..
قتیل شفائی

۔۔۔۔۔۔۔۔۔۔۔۔۔۔۔۔۔۔۔۔۔

لے چلا جان مري روٹھ کے جانا تيرا
ايسے آنے سے تو بہتر تھا نہ آنا تيرا
تو جو اے زلف پريشان رہا کرتي ہے
کس کے اجڑے ہوئے دل ميں ہے ٹھکانا تيرا
اپني آنکھوں ميں کوند گئي بجلي سي
ہم نہ سمجھے کہ يہ آنا ہے کہ جانا تيرا

شاعر:::::::: داغ دہلوی

۔۔۔۔۔۔۔۔۔۔۔۔۔۔۔۔۔۔۔۔۔۔۔

استاد قمر جلالوی

مری لحد پہ پتنگوں کا خون ہوتا ہے،
حضور شمع نہ لایا کریں جلانے کو.

ظاہر کی آنکھ سے نہ تماشا کرے کوئی
ہو دیکھنا تو دیدہ دل وا کرے کوئی

منصور کو ہوا لب گویا پیام موت
اب کیا کسی کے عشق کا دعوی کرے کوئی

ہو دید کا جو شوق تو آنکھوں کو بند کر
ہے دیکھنا یہی کہ نہ دیکھا کرے کوئی

میں انتہائے عشق ہوں تو انتہائے حسن
دیکھے مجھے کہ تجھ کو تماشا کرے کوئی

عذر آفرین جرم محبت ہے حسن دوست
محشر میں عذر تازہ نہ پیدا کرے کوئی

چھپتی نہیں ہے یہ نگہ شوق ہم نشیں
پھر اور کس طرح انہیں دیکھا کرے کوئی

اڑ بیٹھے کیا سمجھ کے بھلا طور پر کلیم
طاقت ہو دید کی تو تقاضا کرے کوئی

نظارے کو بہ جنبش مژگاں بھی بار ہے
نرگس کی آنکھ سے تجھے دیکھا کرے کوئی

کھل جائیں کیا مزے ہیں تمنائے شوق میں
دو چار دن جو میری تمنا کرے کوئی

اقبال

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اَگرچہ شہر میں کُل سو ، پچاس ہوتے ہیں
ذَہین لوگ ترقی کی آس ہوتے ہیں

لکیر کے ہیں فقیر اَوّل آنے والے سبھی
ذَہین بچے ذِرا بدحواس ہوتے ہیں

جو اِن کو کچھ کہے ، خود آشکار ہوتا ہے
ذَہین ، پانی کا آدھا گلاس ہوتے ہیں

’’کسی نے کیوں کیا ایسا‘‘ پہ خوب سوچتے ہیں
ذَہین ، پائے کے مردُم شناس ہوتے ہیں

خوشی کو جانتے ہیں غم کا ’’ حاصلِ ضمنی ‘‘
ذَہین لوگوں کو غم خوب راس ہوتے ہیں

ذَہین ، دُنیا کو ظاہر پرست مانتے ہیں
سو جب ضَروری لگے خوش لباس ہوتے ہیں

یہ سادہ لوح نظر آنے کے بھی ماہر ہیں
ذَہین چہرے بڑے بے قیاس ہوتے ہیں

ذَہین تخت نشینی کا سوچتے بھی نہیں
یہ تخت و تختے کے بس آس پاس ہوتے ہیں

جو اِن کو روندنے جاتا ہے ، ڈُوب جاتا ہے
ذَہین ، گہرے سمندر پہ گھاس ہوتے ہیں

یہ چونکہ طفل تسلی میں کم ہی آتے ہیں
ذَہین لوگ زِیادہ اُداس ہوتے ہیں

ذَہین ، مجنوں بھی بن سکتے ہیں یہ سوچ کے قیسؔ
کہ ’’ کر گزرنے ‘‘ کی مجنوں اَساس ہوتے ہیں

…………………………………………………………….

چاک پیراہنیِ گُل کو صبا جانتی ہے
مستیِ شوق کہاں بندِ قبا جانتی ہے
ہم تو بدنامِ محبت تھے سو رُسوا ٹھہرے
ناصحوں کو بھی مگر خلقِ خدا جانتی ہے
کون طاقوں پہ رہا کون سرِ راہگزار
شہر کے سارے چراغوں کو ہوا جانتی ہے
ہوس انعام سمجھتی ہے کرم کو تیرے
اور محبت ہے کہ احساں کو سزا جانتی ہے
احمد فراز

…………………………………….
دل تجھے ناز ہے جس شخص کی دلداری پر
دیکھ اب وہ بھی اُتر آیا اداکاری پر

میں نے دشمن کو جگایا تو بہت تھا لیکن
احتجاجاً نہیں جاگا مری بیداری پر

آدمی، آدمی کو کھائے چلا جاتا ہے
کچھ تو تحقیق کرو اس نئی بیماری پر

کبھی اِس جرم پہ سر کاٹ دئے جاتے تھے
اب تو انعام دیا جاتا ہے غدّاری پر

تیری قربت کا نشہ ٹوٹ رہا ہے مجھ میں
اس قدر سہل نہ ہو تو مری دشواری پر

مجھ میں یوں تازہ ملاقات کے موسم جاگے
آئینہ ہنسنے لگا ہے مری تیاری پر

کوئی دیکھے بھرے بازار کی ویرانی کو
کچھ نہ کچھ مفت ہے ہر شے کی خریداری پر

بس یہی وقت ہے سچ منہ سے نکل جانے دو
لوگ اُتر آئے ہیں ظالم کی طرف داری پر

سلیم کوثر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آپ کو دیکھ کر دیکھتا رہ گیا
کیا کہوں، اور کہنے کو کیا رہ گیا

ان کی آنکھوں سے کیسے چھلکنے لگا
میرے ہونٹوں پہ جو ماجرا رہ گیا

ایسے بچھڑے سبھی رات کے موڑ پر
آخری ہمسفر راستہ رہ گیا

سوچ کر آؤ کوئے تمنا ھے یہ
جان_ من جو یہاں رہ گیا ، رہ گیا.
–

آپ کو دیکھ کر دیکھتا رہ گیا
کیا کہوں، اور کہنے کو کیا رہ گیا

آتے آتے میرا نام سا رہ گیا
اس کے ہونٹوں پہ کچھ کانپتا رہ گیا

جھوٹ والے کہیں سے کہیں بڑھ گئے
اور میں تھا کہ سچ بولتا رہ گیا

وہ میرے سامنے ہی گیا اور میں
راستے کی طرح دیکھتا رہ گیا

آندھیوں کے ارادے تو اچھے نہ تھے
یہ دیا کیسے جلتا ہوا رہ گیا

– وسیم بریلوی –

۔۔۔۔

دل میں اب یوں ترے بھولے ہوئے غم آتے ہیں
جیسے بچھڑے ہوئے کعبے میں صنم آتے ہیں

ایک اک کر کے ہوئے جاتے ہیں تارے روشن
میری منزل کی طرف تیرے قدم آتے ہیں

رقصِ مے تیز کرو، ساز کی لے تیز کرو
سوئے مے خانہ سفیرانِ حرم آتے ہیں

کچھ ہمیں کو نہیں احسان اُٹھانے کا دماغ
وہ تو جب آتے ہیں، مائل بہ کرم آتے ہیں

اور کچھ دیر گزرے شبِ فرقت سے کہو
دل بھی کم دکھتا ہے، وہ یاد بھی کم آتے ہیں
فیض احمد فیض

۔۔۔۔۔۔۔۔۔۔۔۔۔۔۔۔۔۔۔۔۔۔۔

ساقی مجھے شباب کا رسیا کہے سُو ہوں
میں خود سے بے نیاز ہوں، جیسا کہے سُو ہوں
۔
میری ہوس کے اندروں محرومیاں ہیں دوست
واماندہ ِ بہار ہوں، گھٹیا کہے سُو ہوں
۔
اب میں کسی کی سوچ بدلنے سے تو رہا
یہ شہر ِ بدگماں مجھے شیدا کہے، سُو ہوں
۔
تُو ہی بتا میں اپنی صفائی‌ میں‌کیا کہوں
تُو بات بات میں مجھے جھوٹا کہے، سُو ہوں
۔
دانش خوداحتسابی کا مجھ میں‌ نہیں دماغ
مُنہ پھٹ ہوں بدمزاج ہوں، دنیا کہے سو ہوں

……………..
ایک پل میں اک صدی کا مزا ہم سے پوچھئے
دو دن کی زندگی کا مزا ہم سے پوچھئے

بھولے ہیں رفتہ رفتہ انہیں مدتوں میں ہم
قسطوں میں خودکشی کا مزا ہم سے پوچھئے

آغاز عاشقی کا مزا آپ جانئے!
انجام عاشقی کا مزا ہم سے پوچھئے

ہنسنے کا شوق ہم کو بھی تھا آپکی طرح
ہنسیے مگر ہنسی کا مزا ہم سے پوچھئے

وہ جان ہی گئے کہ ہمیں ان سے پیار ہے
آنکھوں کی مخبری کا مزا ہم سے پوچھئے

جلتے دئیوں میں جلتے گھروں جیسی ضو کہاں
سرکار روشنی کا مزا ہم سے پوچھئے

ہم توبہ کر کے مر گئے قبل اجل خمار
توہینِ مے کشی کا مزا ہم سے پوچھئے
…………..
بس جائے تو صحرا ھے، اجڑ جائے تو دنیا..
ہم لوگ ہیں کچھ خانہ خراب اور طرح کے..

(سید خورشید رضوی)

……….

کہا: تخلیق فن؟ بولے: بہت دُشوار تو ہو گی
کہا: مخلُوق؟ بولے: باعثِ آزار تو ہو گی

کہا: ہم کیا کریں اِس عہد ِناپُرساں میں، کچھ کہیے
وہ بولے: کوئی آخر صُورت ِاظہار تو ہو گی

کہا: ہم اپنی مرضی سے سفر بھی کر نہیں سکتے
وہ بولے: ہر قدم پر اِک نئی دیوار تو ہو گی

کہا: آنکھیں نہیں! اِس غم میں بینائی بھی جاتی ہے
وہ بولے: ہجر کی شب ہے ، ذرا دُشوار تو ہو گی

کہا: جلتا ہے دل، بولے: اِسے جلنے دیا جائے
اندھیرے میں کِسی کو روشنی درکار تو ہو گی

کہا: یہ کوچہ گری اور کتنی دیر تک آخر؟
وہ بولے: عشق میں مٹی تمہاری خوار تو ہو گی

شاعر : اعتبار ساجد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زندگی سے بڑی سزا ہی نہیں
اور کیا جرم ہے ۔۔۔۔۔ پتا ہی نہیں

سچ گھٹے یا بڑھے تو سچ نہ رہے
جھوٹ کی کوئی انتہا ہی نہیں

اتنے حصوں میں بٹ گیا ہوں میں
میرے حصے میں کچھ بچا ہی نہیں

زندگی ۔۔۔۔۔۔ موت تیری منزل ہے
دوسرا کوئی راستہ ہی نہیں

جس کے کارن فساد ہوتے ہیں
اُس کا کوئی اتا پتا ہی نہیں

اپنی رچناؤں میں وہ زندہ ہے
نُور سنسار سے گیا ہی نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کرشن بہاری نُور لکھنوی

…………………………..۔۔۔۔۔۔۔۔۔۔۔۔۔۔۔۔۔۔

ایک ہی مژدہ صبح لاتی ہے
دھوپ آنگن میں‌ پھیل جاتی ہے

فرش پر کاغذ اڑتے پھرتے ہیں‌
میز پر گرد جمتی جاتی ہے

سوچتا ہوں کہ اس کی یاد آخر
اب کسے رات بھر جگاتی ہے

سوگئے پیڑ جاگ اٹھی خوشبو
زندگی خواب کیوں‌ دکھاتی ہے

آپ اپنے سے ہم سخن رہنا
ہمنشیں! سانس پھول جاتی ہے

کیا ستم ہے کہ اب تِری صورت
غور کرنے پہ یاد آتی ہے

کون اس گھر کی دیکھ بھال کرے
روز ایک چیز ٹوٹ جاتی ہے

شاعر : جون ایلیا

۔۔۔۔۔۔۔۔۔۔۔۔۔۔۔۔۔۔۔۔

گھر تو دونوں پاس ہیں لیکن ملاقاتیں کہاں

آمدورفت آدمی کی ہے، پہ وہ باتیں کہاں

ہم فقیروں کی طرف بھی تو نگاہیں دم بدم

پھینکتے جاتے تھے آپ آگے، وہ خیراتیں کہاں

بعد مرنے کے مرے ہوگی مرے رونے کی قدر

تب کہا کیجے گا لوگوں سے وہ برساتیں کہاں

یوں تو ہے دن رات میرے دل میں اس کا ہی خیال

جن دنوں اپنی بغل میں تھا سو وہ راتیں کہاں

جس طرح سے کھیلتا ہے وہ دلوں کا یاں شکار

درد آتی ہیں کسی دلبر کو وہ گھاتیں کہاں

…………………………………………..

غزل

کِسی کا درد ہو دِل بے قرار اپنا ہے

ہَوا کہِیں کی ہو، سینہ فگار اپنا ہے

ہو کوئی فصل مگر زخم کِھل ہی جاتے ہیں

سدا بہار دلِ داغدار اپنا ہے

بَلا سے ہم نہ پیئیں، میکدہ تو گرم ہُوا

بقدرِ تشنگی رنجِ خُمار اپنا ہے

جو شاد پھرتے تھے کل، آج چُھپ کے روتے ہیں

ہزار شُکر غمِ پائیدار اپنا ہے

اِسی لیے یہاں کُچھ لوگ ہم سے جلتے ہیں

کہ جی جلانے میں کیوں اِختیار اپنا ہے

نہ تنگ کر دلِ مخزوں کو اے غمِ دنیا !

خُدائی بھر میں یہی غم گسار اپنا ہے

کہیں مِلا تو کِسی دن منا ہی لیں گے اُسے

وہ ذُود رنج سہی ، پھر بھی یار اپنا ہے

وہ کوئی اپنے سِوا ہو تو اُس کا شِکوہ کرُوں

جُدائی اپنی ہے اور انتظار اپنا ہے

نہ ڈھونڈھ ناصرِ آشفتہ حال کو گھر میں

وہ بُوئے گُل کی طرح بے قرار اپنا ہے

ناصرکاظمی

………………………………………

………. (جون ایلیاء) ………
لمحے کو بےوفا سمجھ لیجئے
جاودانی ادا سمجھ لیجئے
……
میری خاموشئ مسلسل کو
اِک مسلسل گِلہ سمجھ لیجئے
……
آپ سے میں نے جو کبھی نہ کہا
اُس کو میرا کہا سمجھ لیجئے
……
جس گلی میں بھی آپ رہتے ہوں
واں مجھے جا بہ جا سمجھ لیجئے
……
آپ آ جایئے قریب مرے
مجھ کو مجھ سے جُدا سمجھ لیجئے
…….
جو نہ پہنچائے آپ تک مجھ کو
آپ اُسے واسطہ سمجھ لیجئے
……
نہیں جب کوئی مدعا میرا
کوئی تو مدعا سمجھ لیجئے
……
جو کبھی حالِ حال میں نہ چلے
اُس کو بادِ صبا سمجھ لیجئے
……
جو کہیں بھی نہ ہو، کبھی بھی نہ ہو
آپ اُس کو خدا سمجھ لیجئے

…………………………….

ہم کریں بات دلیلوں سے ،تو رد ہوتی ہے

اس کے ہونٹوں کی خموشی بھی سند ہوتی ہے

سانس لیتے ہوئے انساں بھی ہے لاشوں کی طرح

اب دھڑکتے ہوئے دل کی بھی لحد ہوتی ہے

اپنی آواز کے پتھر بھی نہ اس تک پہنچے

اس کی آنکھوں کے اشارے میں بھی زد ہوتی ہے

شعبدہ گر بھی پہنتے ہیں خطیبوں کا لباس

بولتا جہل ہے بدنام خرد ہوتی ہے

کچھ نہ کہنے سے بھی چھن جاتا ہے اعزاز سخن

ظلم سہنے سے بھی ظالم کی مدد ہوتی ہے

شاعر : مظفر وارثی

……………………

حالتِ حال کے سبب، حالتِ حال ہی گئی
شوق میں کچھ نہیں گیا، شوق کی زندگی گئی

ایک ہی حادثہ تو ہے، اور وہ یہ کہ آج تک
بات نہیں کہی گئی، بات نہیں سنی گئی

بعد بھی تیرے جانِ جاں، دل میں رہا عجب سماں
یاد رہی تری یہاں، پھر تری یاد بھی گئی

صحنِ خیالِ یار میں، کی نہ بسر شبِ فراق
جب سے وہ چاندنہ گیا، جب سے وہ چاندنی گئی

اس کے بدن کو دی نمود، ہم نے سخن میں اور پھر
اس کے بدن کے واسطے، ایک قبا بھی سی گئی

اس کی امیدِ ناز کا، ہم سے یہ مان تھا کہ آپ
عمر گزار دیجیے، عمر گزار دی گئی

اس کے وصال کے لیے، اپنے کمال کے لیے
حالتِ دل کہ تھی خراب، اور خراب کی گئی

تیرا فراق جانِ جاں، عیش تھا کیا مرے لیے
یعنی ترے فراق میں، خوب شراب پی گئی

اس کی گلی سے اٹھ کے میں، آن پڑا تھا اپنے گھر
ایک گلی کی بات تھی، اور گلی گلی گئی

جون ایلیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

واعظ بڑا مزا ہو اگر یوں عذاب ہو

دوزخ میں پاؤں ہاتھ میں جامِ شراب ہو

معشوق کا تو جُرم ہو، عاشق خراب ہو

کوئی کرے گناہ کسی پر عذاب ہو

وہ مجھ پہ شیفتہ ہو مجھے اجتناب ہو

یہ انقلاب ہو تو بڑا انقلاب ہو

دنیا میں کیا دھرا ہے؟ قیامت میں لطف ہو

میرا جواب ہو نہ تمہارا جواب ہو

نکلے جدھر سے وہ، یہی چرچا ہوا کیا

اس طرح کا جمال ہو ایسا شباب ہو

در پردہ تم جلاؤ، جلاؤں نہ میں چہ خوش

میرا بھی نام داغ ہے گر تم حجاب ہو

داغ دہلوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خُمار بارہ بنکوی

حسن جب مہرباں ہو تو کیا کیجیے

عشق کی مغفرت کی دعا کیجیے

اس سلیقے سے ان سے گلہ کیجیے

جب گلہ کیجیے ہنس دیا کیجیے

دوسروں پر اگر تبصرہ کیجیے

سامنے آئینہ رکھ لیا کیجیے

آپ سُکھ سے ہیں ترکِ تعلق کے بعد

اتنی جلدی نہ یہ فیصلہ کیجیے

زندگی کٹ‌رہی ہے بڑے چین سے

اور غم ہوں تو وہ بھی عطا کیجیے

کوئی دھوکا نہ کھا جائے میری طرح

ایسے کھُل کے نہ سب سے ملا کیجیے

عقل و دل اپنی اپنی کہیں جب خمار

عقل کی سُنیے، دل کا کہا کیجیے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دلوں میں آگ لبوں پر گلاب رکھتے ہیں

سب اپنے چہروں پہ دہری نقاب رکھتے ہیںجھ کر

ہم اپنے گھر میں کئی آفتاب رکھتے ہیں

بہت سے لوگ کہ جو حرف آشنا بھی نہیں

اسی میں خوش ہیں کہ تیری کتاب رکھتے ہیں

یہ میکدہ ہے، وہ مسجد ہے، وہ ہے بت خانہ

کہیں بھی جاؤ فرشتے حساب رکھتے ہیں

ہمارے شہر کے منظر نہ دیکھ پائیں گے

یہاں کے لوگ تو آنکھوں میں خواب رکھتے ہیں

راحت اندوری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نِگاہِ لُطف مت اُٹھ ، خُوگرِ آلام رہنے دے
ہمیں ناکام رہنا ہے، ہمیں ناکام رہنے دے

کسی معصُوم پر بیداد کا اِلزام کیا معنی
یہ وحشت خیز باتیں عشقِ بدانجام رہنے دے

ابھی رہنے دے دل میں شوقِ شورِیدہ کے ہنگامے
ابھی سر میں محبّت کا جنُونِ خام رہنے دے

ابھی رہنے دے کچُھ دن لُطفِ نغمہ، مستئ صہبا
ابھی یہ ساز رہنے دے، ابھی یہ جام رہنے دے

کہاں تک حُسن بھی آخر کرے پاسِ وضع داری
اگر یہ عشق خود ہی فرقِ خاص و عام رہنے

بہ ایں رِندی، مجاز اک شاعرِ مزدور و دہقاں ہے
اگر شہروں میں وہ بدنام ہے، بدنام رہنے دے

اسرار الحق مجاز
سر ِ تسلیم ہے خم اذن ِ عقوبت کے بغیر
ہم تو سرکار کے مداح ہیں خلعت کے بغیر

سر برہنہ ہوں تو کیا غم ہے کہ اب شہر میں لوگ
برگزیدہ ہوئے دستار ِ فضیلت کے بغیر

دیکھ تنہا مری آواز کہاں تک پہنچی
کیا سفر طے نہیں ہوتے ہیں رفاقت کے بغیر

عشق میں میرؔ کے آداب نہ برتو کہ یہاں
کام چلتا نہیں اعلان ِ محبت کے بغیر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہم نہ جیتے ہیں اور نہ مرتے ہیں

نہ درد بھیجو ، نہ تم دوا بھیجو

کچھ تو رشتہ ہے تم سے کم بختو

کچھ نہیں ____ کوئی بدعا بھیجو

جون ایلیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بس یہ سنتے ہی سخن ختم ہمارا ہو جائے

واہ کیا کہنے بہت خوب دوبارہ ہو جائے

رات بھر ہوتی رہے ٹوٹ کے دریا زاری

یوں بغل گیر کنارے سے کنارا ہو جائے

روز کرتا ہوں میں دنیا کے محلے میں خرام

جانے کب کون سی چلمن سے اشارہ ہو جائے

چاک سے ہو کے بھی صد چاک لیے پھرتا ہے

جسم کی آخری خواہش ہے کہ گارا ہو جائے

بد دعا مانگنے والے کی د عا کے صدقے

ہر برا آدمی اللہ کو پیارا ہو جائے

رزق تو خیر مری ثانوی ترجیح رہا

عشق بھی اتنا کمایا کہ گزارا ہو جائے

افضل خان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

“آج جانے کی ضد نہ کرو” ــــــــــ شاعر : فیاض ہاشمی

آج جانے کی ضد نہ کرو

یونہی پہلو میں بیٹھو رہو

ہائے ! مر جائیں گے، ہم تو لُٹ جائیں گے

ایسی باتیں کیا نہ کرو

تم ہی سوچو ذرا کیوں نہ روکیں تمہیں

جان جاتی ہے جب اُٹھ کے جاتے ہو تم

تم کو اپنی قسم جانِ جاں

بات اتنی میری مان لو

وقت کی قید میں زندگی ہے مگر

چند گھڑیاں یہی ہیں جو آزاد ہیں

ان کو کھو کر ابھی جانِ جاں

عمر بھر نہ ترستے رہو

کتنا معصوم و رنگیں ہے یہ سماں

حسن اور عشق کی آج معراج ہے

کل کی کس کو خبر جانِ جاں

روک لو آج کی رات کو

گیسوؤں کی شکن ہے ابھی شبنمی

اور پلکوں کے سائے بھی مد ہوش ہیں

حسنِ معصوم کو جانِ جاں

بے خودی میں نہ رسوا کرو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گزر چکا ہے زمانہ وہ انکساری کا

کہ اب مزاج بنا لیجیئے شکاری کا

ہم احترمِ محبت میں ‌سر جکھاتے ہیں

غلط نکال نہ مفہوم خاکساری کا

وہ باد شاہ بنے بیٹھے ہیں مقدر سے مگر

مزاج ان کا ہے اب تک وہی بھکاری کا

سب اس کے جھوٹ کو بھی سچ سمجھنے لگتے ہیں

وہ ایک ڈھونگ رچاتا ہے شرم ساری کا

جنہیں بلندی پہ پہنچنا ہے جست بھرتے ہیں

وہ انتظار نہیں کرتے کھبی اپنی باری کا

منظر بھوپالی

=======================

یار کو ہم نے جا بجا دیکھا
کہیں ظاہر کھیں چھپا دیکھا

کہیں ممکن ہوا کہیں واجب
کہیں فانی کہیں بقا دیکھا

کہیں بولا بلیٰ وہ کہہ کے الست
کہیں بندہ کہیں خدا دیکھا

کہیں بیگانہ وش نظر آیا
کہیں صورت سے آشنا دیکھا

کہیں وہ بادشاہِ تخت نشیں
کہیں کاسہ لئے گدا دیکھا

کہیں عابد بنا کہیں زاہد
کہیں رندوں کا پیشوا دیکھا

کہیں رقاص اور کہیں مطرب
کہیں وہ ساز باجتا دیکھا

کہیں وہ در لباسِ معشوقاں
بر سرِ ناز اور ادا دیکھا

کہیں عاشق نیاز کی صورت
سینہ بریان و دل جلا دیکھا

(شاہ نیاز بریلوی)

=======================

عشق میں آ عجب مزا دیکھا
خویش و بیگانہ آشنا دیکھا

نکتۂ انما سے واقف ہو
چہرۂ یار جا بجا دیکھا

بلکہ یہ بولنا تکلف ہے
ہم نے اُس کو سنا ہے یا دیکھا

دیکھتا آپ ہی سنے ہے آپ
نہ کوئی اُس کا ماسوا دیکھا

دید اپنی کی تھی اُسے خواہش
آپ کو ہر طرح بنا دیکھا

صورتِ گل میں کھل کھلا کے ہنسا
شکلِ بلبل میں چہچہا دیکھا

شمع ہو کر کے اور پروانہ
آپ کو آپ میں جلا دیکھا

کر کے دعویٰ کہیں اناالحق کا
بر سرِ دار وہ کھنچا دیکھا

تھا وہ برتر شما و ما سے نیاز
پھر وہی اب شما و ما دیکھا

(شاہ نیاز بریلوی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آپ کی آنکھ اگر آج گلابی ہوگی

میری سرکار بڑی سخت خرابی ہوگی

شیخ جی ہم تو جہنّم کے پرندے ٹھہرے

آپ کے پاس تو فردوس کی چابی ہوگی

کردیا موسیٰ کو جس چیز نے بےہوش عدم

بےنقابی نہیں وہ نیم حجابی ہوگی

سید عبدالحمید عدم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہم ہیں آوارہ سُو بسُو لوگو

جیسے جنگل میں رنگ و بُو لوگو

ساعتِ چند کے مُسافر سے

کوئی دم اور گفتگو لوگو

تھے تمہاری طرح کبھی ہم لوگ

گھر ہمارے بھی تھے کبھو لوگو

ایک منزل سے ہو کے آئے ہیں

ایک منزل ہے رُوبُرو لوگو

وقت ہوتا تو آرزو کرتے

جانے کِس شے کی آرزو لوگو

تاب ہوتی تو جتسجُو کرتے

اب تو مایوس جستجُو لوگو

ابنِ انشا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جب سے تو نے مجھے دیوانہ بنا رکھا ہے

سنگ ہر شخص نے ہاتھوں میں اٹھا رکھا ہے

اس کے دل پر بھی کڑی عشق میں گزری ہو گی

نام جس نے بھی محبت کا سزا رکھا ہے

پتھروں آج میرے سر پر برستے کیوں ہو

میں نے تم کو بھی کبھی اپنا خدا رکھا ہے

اب میری دید کی دنیا بھی تماشائی ہے

تو نے کیا مجھ کو محبت میں بنا رکھا ہے

غم نہیں گل جو کیئے گھر کے ہواؤں نے چراغ

ہم نے دل کا بھی دیا ایک جلا رکھا ہے

پی جا ایام کی تلخی کو بھی ہنس کر ناصر

غم کو سہنے میں بھی قدرت نے مزہ رکھا ہے

شاعر ؒ حکیم ناصر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دنیا میں ہوں، دنیا کا طلب گار نہیں ہوں
بازار سے گزرا ہوں، خریدار نہیں ہوں

زندہ ہوں مگر زیست کی لذت نہیں باقی
ہر چند کہ ہوں ہوش میں، ہشیار نہیں ہوں

اس خانۂ ہستی سے گزر جاؤں گا بے لوث
سایہ ہوں فقط ، نقش بہ دیوار نہیں ہوں

وہ گُل ہوں، خزاں نے جسے برباد کیا ہے
الجھوں کسی دامن سے، میں وہ خار نہیں ہوں

یارب! مجھے محفوظ رکھ اُس بُت کے ستم سے
میں اُس کی عنایت کا طلبگار نہیں ہوں

گو دعویِ تقویٰ نہیں درگاہِ خدا میں
بُت جس سے ہوں خوش ایسا گنہ گار نہیں ہوں

افسردگی و ضعف کی کچھ حد نہیں اکبر
کافر کے مقابل میں بھی دِیں دار نہیں ہوں

اکبر الہ آبادی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

معروف ادیب و عالم حضرت تقی عثمانی کے بھائی اور مشہور شاعر جناب سعود عثمانی کے والد صاحب حضرت زکی کیفی مرحوم کے چند اشعار…

دوستوں کی نذر…

عشق تسلیم و رضا کے ماسوا کچھ بھی نہیں

وہ وفا سے خوش نہ ہوں تو پھر وفا کچھ بھی نہیں

مدتوں ان کی طلب میں خاک چھانی تو کھلا

ایک پردہ بیچ میں ہے، فاصلہ کچھ بھی نہیں

زندگی کا ماحصل ہیں الٹے سیدھے کچھ نقوش

کس قدر خاکے بنائے اور بنا کچھ بھی نہیں

زندگی کی داستاں ہے ایک دیوانے کا خواب

مدتوں سے کہہ رہا ہوں اور کہا کچھ بھی نہیں

روبرو بھی وہ نہیں ہیں، پھر بھی ہیں رازو نیاز

گفتگو ہے اور آواز و صدا کچھ بھی نہیں

سامنا ان کا ہوا تو سب حقیقت کھل گئی

ہم سمجھتے تھے کہ دل کا تھامنا کچھ بھی نہیں

زندگی کو ہم نے بخشا شیوۂ سوز و گداز

زندگی سے ہم نے لیکن کیا لیا؟ کچھ بھی نہیں

عشق پہلے جذب و مستی، پھر سکوت_بیکراں

ابتدا سب کچھ ہے لیکن انتہا کچھ بھی نہیں

ان سے مس ہوکر جو آئے وہ جہان_رنگ و بو

ان کے کوچے سے نہ گزرے تو صبا کچھ بھی نہیں

از کیفیات

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اچھی صورت پہ غضب ٹوٹ کے آنا دل کا

یاد آتا ہے ہمیں ہائے زمانا دل کا

تم بھی منہ چوم لو بے ساختہ پیار آ جائے

میں سناؤں جو کبھی دل سے فسانا دل کا

نگۂ یار نے کی خانہ خرابی ایسی

نہ ٹھکانا ہے جگر کا نہ ٹھکانا دل کا

پوری مہندی بھی لگانی نہیں آتی اب تک

کیوں کر آیا تجھے غیروں سے لگانا دل کا

غنچۂ گل کو وہ مٹھی میں لیے آتے تھے

میں نے پوچھا تو کیا مجھ سے بہانا دل کا

ان حسینوں کا لڑکپن ہی رہے یا اللہ

ہوش آتا ہے تو آتا ہے ستانا دل کا

دے خدا اور جگہ سینہ و پہلو کے سوا

کہ برے وقت میں ہوجائے ٹھکانا دل کا

میری آغوش سے کیا ہی وہ تڑپ کر نکلے

ان کا جانا تھا الٰہی کہ یہ جانا دل کا

نگۂ شرم کو بے تاب کیا، کام کیا

رنگ لایا تری آنکھوں میں سمانا دل کا

انگلیاں تارِ گریباں میں الجھ جاتی ہیں

سخت دشوار ہے ہاتھوں سے دبانا دل کا

حور کی شکل ہو تم، نور کے پتلے ہو تم

اور اس پر تمہیں آتا ہے جلانا دل کا

چھوڑ کر اس کو تری بزم سے کیوں کر جاؤں

اک جنازے کا اٹھانا ہے اٹھانا دل کا

بے دلی کا جو کہا حال تو فرماتے ہیں

کر لیا تونے کہیں اور ٹھکانا دل کا

بعد مدت کے یہ اے داغ سمجھ میں آیا

وہی دانا ہے کہا جس نے نہ مانا دل کا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

انگڑائی بھی وہ لینے نہ پائے اٹھا کے ہاتھ

دیکھا جو مجھ کو چھوڑ دیے مسکرا کے ہاتھ

بے ساختہ نگاہیں جو آپس میں مل گئیں

کیا منہ پر اس نے رکھ لیے آنکھیں چرا کے ہاتھ

یہ بھی نیا ستم ہے حنا تو لگائیں غیر

اور اس کی داد چاہیں وہ مجھ کو دکھا کے ہاتھ

بے اختیار ہوکے جو میں پاؤں پر گرا

ٹھوڑی کے نیچے اس نے دھرا مسکرا کے ہاتھ

قاصد ترے بیاں سے دل ایسا ٹھہر گیا

گویا کسی نے رکھ دیا سینے پہ آ کے ہاتھ

اے دل، کچھ اور بات کی رغبت نہ دے مجھے

سننی پڑیں گی سینکڑوں اُس کے لگا کے ہاتھ

وہ کچھ کسی کا کہہ کے ستانا سدا مجھے

وہ کھینچ لینا پردے سے اپنا دکھا کے ہاتھ

دیکھا جو کچھ رکا مجھے تو کس تپاک سے

گردن میں میری ڈال دیے آپ آ کے ہاتھ

کوچے سے تیرے اُٹھّیں تو پھر جائیں ہم کہاں

بیٹھے ہیں یاں تو دونوں جہاں سے اٹھا کے ہاتھ

پہچانا پھر تو کیا ہی ندامت ہوئی انہیں

پنڈت سمجھ کے مجھ کو اور اپنا دکھا کے ہاتھ

دینا وہ اس کا ساغرِ مے یاد ہے نظام

منہ پھیر کر اُدھر کو اِدھر کو بڑھا کے ہاتھ

شاعر : نظام رامپوری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عشق ميں غيرت ِ جذبات نے رونے نہ ديا

ورنہ کيا بات تھي، کس بات نے رونے نہ ديا

آپ کہتے تھے کہ رونے سے نہ بدليں گے نصيب

عمر بھر آپ کي اس بات نے رونے نہ ديا

رونے والوں سے کہو، ان کا بھي رونا روليں

جن کو مجبوري ِ حالات نے رونے نہ ديا

تجھ سے مل کر ہميں رونا تھا، بہت رونا تھا

تنگي ِ وقت ِ ملاقات نے رونے نہ ديا

ايک دو روز کا صدمہ ہو تو رو ليں، فاکر

ہم کو ہر روز کے صدمات نے رونے نہ ديا

سدرشن فاکر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لَو دل کا داغ دے اٹھے ایسا نہ کیجیے
ہے ڈر کی بات آگ سے کھیلا نہ کیجیے
کہتا ہے عکس حُسن کو رسوا نہ کیجیے
ہر وقت آپ آئینہ دیکھا نہ کیجیے
کہتی ہے مے فروشوں سے میری سفید ریش
دے دیں گے دام، اُن سے تقاضا نہ کیجیے
اچھی نہیں یہ آپ کی محشر خرامیاں
دُنیا کو اِس طرح تہ و بالا نہ کیجیے
ہے زیرِ بحث فرق سفید و سیاہ کا
بندِ نقاب اپنے ابھی وا نہ کیجیے
اُٹھنے کو اُٹھّے آپ کے کوچے سے روزِ حشر
ایسے کو آنکھ اُٹھا کے بھی دیکھا نہ کیجیے
اپنی حنا کو دیکھیے، نازک سے ہاتھ کو
وہ ڈر رہی ہے خونِ تمنّا نہ کیجیے
آئے گی خُم میں غیب سے وہ دے گا اے ریاض
تلچھٹ بھی کُچھ ہو تو غمِ فردا نہ کیجیے
۔۔۔۔۔۔۔۔۔۔
جس دن سے حرام ہو گئی ہے
مے، خلد مقام ہو گئی ہے
قابو میں ہے ان کے وصل کا دن
جب آئے ہیں شام ہو گئی ہے
آتے ہی قیامت اس گلی میں
پامالِ خرام ہو گئی ہے
توبہ سے ہماری بوتل اچھّی
جب ٹوٹی ہے، جام ہو گئی ہے
مے نوش ضرور ہیں وہ نا اہل
جن پر یہ حرام ہو گئی ہے
بجھ بجھ کے جلی تھی قبر پر شمع
جل جل کے تمام ہو گئی ہے
ہر بات میں ہونٹ پر ہے دشنام
اب حسنِ کلام ہو گئی ہے
۔۔۔۔۔۔۔۔۔۔۔۔۔
مئے رہے، مینا رہے، گردش میں‌ پیمانہ رہے
میرے ساقی تُو رہے آباد میخانہ رہے
حشر بھی تو ہو چکا، رخ سے نہیں‌ ہٹتی نقاب
حد بھی آخر کچھ ہے کب تک کوئی دیوانہ رہے
رات کو جا بیٹھتے ہیں‌ روز ہم مجنوں‌ کے پاس
پہلے اَن بن رہ چکی ہے اب تو یارانہ رہے
زندگی کا لطف ہو، اڑتی رہے ہر دم ریاض
ہم ہوں شیشے کی پری ہو، گھر پری خانہ رہے
۔۔۔۔۔۔۔۔۔۔۔۔۔۔۔
ساغر چڑھائے پھول کے ہرشاخسار نے
دریا بہا دئے خم ابر بہار نے
روشن کئے چراغِ لحد لالہ زار نے
اس مرتبہ تو آگ لگادی بہار نے
اودی گھٹائیں چھائی ہیں اے میکشو چلو
پریوں کے تخت روک لئے سبزہ زار نے
اتنا تو ہم بھی جانتے ہیں ایک آہ کی
بے آس ہو کے اس دل امیدوار نے
سینہ تک آئے سوتے میں کب میری دست شوق
دھوکا دیا تجھے تیرے پھولوں کے ہار نے
صبح شب وصال مجھے منفعل کیا
تونے تو کیا تری نگہ شرمسار نے
بے شغل جام و بادہ جواں ہوگئے ریاض
ڈالا اثر یہ آمدِ فصل بہار نے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ﺁﻧﮑﮭﻮﮞ ﻣﯿﮟ ﺭﺍﮐﮫ ﺳﺠﺎﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

ﻣﻮﺳﻢ ﮐﮯ ﺭﻧﮓ ﺑﺪﻟﺘﮯ ﮨﯿﮟ ﻟﮩﺮﺍ ﮐﺮ ﺟﮭﻮﻧﮑﮯ ﺁﺗﮯ ﮨﯿﮟ

ﺷﺎﺧﻮﮞ ﺳﮯ ﺑﻮﺭ ﺍﮌﺍﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

ﯾﺎﺩﻭﮞ ﮐﯽ ﮔﺮﻡ ﮨﻮﺍﺅﮞ ﺳﮯ #ﺁﻧﮑﮭﻮﮞ ﮐﯽ ﮐﻠﯿﺎﮞﺟﻠﺘﯽﮨﯿﮟ

ﺟﺐ #ﺁﻧﺴﻮ ﺩﺭﺩ ﺑﮩﺎﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

ﺑﮯ ﺩﺭﺩ ﮨﻮﺍﺋﯿﮟ ﺳﮧ ﺳﮧ ﮐﺮ ﺳﻮﺭﺝ ﮐﮯ ﮈﮬﻠﺘﮯ #آئینوﮞ ﻣﯿﮟ

ﺟﺐ ﭘﻨﭽﮭﯽ ﻟﻮﭦ ﮐﮯ ﺁﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ

ﮨﯿﮟ

ﺟﺐ ﻟﻮﮒ ﺟﮩﺎﮞ ﮐﮯ ﻗﺼﻮﮞ ﻣﯿﮟ ﺩﻡ ﺑﮭﺮ ﮐﺎ ﻣﻮﻗﻌﮧ ﻣﻠﺘﮯ ہی

ﻟﻔﻈﻮﮞ ﮐﮯ ﺗﯿﺮ ﭼﻼﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

ﯾﮧ ﻋﺸﻖ ﻣﺤﺒﺖ ﮐﭽﮫ ﺑﮭﯽ ﻧﮩﯿﮟ ﻓﺮﺻﺖ ﮐﯽ ﮐﺎﺭﺳﺘﺎﻧﯽ

ﮨﮯ

ﺟﺐ ﻟﻮﮒ ﻣﺠﮭﮯ ﺳﻤﺠﮭﺎﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ

ﮨﯿﮟ

ﺟﺐ ﮐﺎﻟﮯ ﺑﺎﺩﻝ ﮔﮭﺮ ﺁﺋﯿﮟ ﺍﻭﺭ #ﺑﺎﺭﺵ ﺯﻭﺭ ﺳﮯ ﮨﻮﺗﯽ ﮨﻮ

ﺩﺭﻭﺍﺯﮮ ﺷﻮﺭ ﻣﭽﺎﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿں

ﺟﺐ ﺁﻧﮕﻦ ﻣﯿﮟ ﺧﺎﻣﻮﺷﯽ ﺍﭘﻨﮯ ﮨﻮﻧﭧ ﭘﮧ ﺍﻧﮕﻠﯽ ﺭﮐﮭﮯ ﮨﻮ

ﺳﻨﺎﭨﮯ ﺟﺐ ﺩﺭ ﺁﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

ﺟﺐ ﺳﺮﺩ ﮨﻮﺍ ﮐﺎ ﺑﺴﺘﺮ ﮨﻮ ﺍﻭﺭ ﯾﺎﺩ ﺳﮯ ﺍﺱ ﮐﯽ ﻟﭙﭩﮯﮨﻮﮞ

ﺗﺐ ﻧﻐﻤﮯ ﺳﮯ ﻟﮩﺮﺍﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

ﺟﺐ ﺍﻭﺱ ﮐﮯ ﻗﻄﺮﮮﭘﮭﻮﻟﻮﮞ ﭘﺮ ﮐﭽﮫ ﻣﻮﺗﯽ ﺳﮯ ﺑﻦﺟﺎﺗﮯ ﮨﯿﮟ

ﺗﺐ ﮨﻢ ﺑﮭﯽ #آنسو ﺑﮩﺎﺗﮯ ﮨﯿﮟ ﮐﭽﮫ ﻟﻮﮒ ﺑﮩﺖ ﯾﺎﺩ ﺁﺗﮯ ﮨﯿﮟ

..,,,,,,,,,,,,,

سینہ دہک رہا ہو تو کیا چُپ رہے کوئی

کیوں چیخ چیخ کر نہ گلا چھیل لے کوئی

ثابت ہُوا سکونِ دل و جان نہیں کہیں

رشتوں میں ڈھونڈتا ہے تو ڈھونڈا کرے کوئی

ترکِ تعلقات تو کوئی مسئلہ نہیں

یہ تو وہ راستہ ہے کہ چل پڑے کوئی

دیوار جانتا تھا جسے میں، وہ دھول تھی

اب مجھ کو اعتماد کی دعوت نہ دے کوئی

میں خود یہ چاہتا ہوں کہ حالات ہوں خراب

میرے خلاف زہر اُگلتا پھرے کوئی!!!

اے شخص اب تو مجھ کو سبھی کچھ قبول ہے

یہ بھی قبول ہے کہ تجھے چھین لے کوئی !!

ہاں ٹھیک ہے میں اپنی اَنا کا مریض ہوں

آخرمیرے مزاج میں کیوں دخل دے کوئی

اک شخص کر رہا ہے ابھی تک وفا کا ذکر

کاش اس زباں دراز کا منہ نوچ لے کوئی

…………………………………………………

چاند کو اُترے دیکھا ہم نے، چاند بھی کیسا؟ پورا چاند

انشاء جی ان چاہنے والی، دیکھنے والی آنکھوں نے

ملکوں ملکوں، شہروں شہروں، کیسا کیسا دیکھا چاند

ہر اک چاند کی اپنی دھج تھی، ہر اک چاند کا اپنا روپ

لیکن ایسا روشن روشن، ہنستا باتیں کرتا چاند ؟

درد کی ٹیس بھی اٹھتی تھی، پر اتنی بھی، بھرپور کبھی؟

آج سے پہلے کب اترا تھا دل میں اتنا گہرا چاند !

ہم نے تو قسمت کے در سے جب پائے، اندھیرے پائے

یہ بھی چاند کا سپنہ ہوگا، کیسا چاند کہاں کا چاند ؟

انشاء جی دنیا والوں میں بےساتھی بے دوست رہے

جیسے تاروں کے جھرمٹ میں تنہا چاند، اکیلا چاند

ان کا دامن اس دولت سے خالی کا خالی ہی رہا

ورنہ تھے دنیا میں کتنے چاندی چاند اور سونا چاند

جگ کے چاروں کوٹ میں گھوما، سیلانی حیران ہوا

اس بستی کے اس کوچے کے اس آنگن میں ایسا چاند ؟

آنکھوں میں بھی، چتون میں بھی، چاندہی چاند جھلکتے ہیں

چاند ہی ٹیکا، چاند ہی جھومر، چہرہ چاند اور ماتھا چاند

ایک یہ چاندنگر کا باسی، جس سے دور رہا سنجوگ

ورنہ اس دنیا میں سب نے چاہا چاند اور پایا چاند

امبر نے دھرتی پر پھینکی نور کی چھینٹ اداس اداس

آج کی شب تو آندھی شب تھی، آج کدھر سے نکلا چاند

انشاء جی یہ اور نگر ہے، اس بستی کی رِیت یہی ہے

سب کی اپنی اپنی آنکھیں، سب کا اپنا اپنا چاند

اپنا سینے کے مطلع پر جو بھی چمکا وہ چاند ہوا

جس نے مَن کے اندھیارے میں آن کیا اُجیارا چاند

چنچل مسکاتی مسکاتی گوری کا مُکھڑا مہتاب

پت جھڑ کے پیڑوں میں اٹکا، پیلا سا اِک پتہ چاند

دکھ کا دریا، سُکھ کا ساگر، اس کے دم سے دیکھ لئے

ہم کو اپنے ساتھ ہی لے کر ڈوبا اور اُبھرا چاند

روشنیوں کی پیلی کرنیں، پورب پچھم پھیل گئیں

تو نے کس شے کےدھوکے میں پتھر پہ دے ٹپکا چاند

ہم نے تو دونوں کو دیکھا، دونوں ہی بےدرد کٹھور

دھرتی والا، امبر والا، پہلا چاند اور دوجا چاند

چاند کسی کا ہو نہیں سکتا، چاند کسی کا ہوتا ہے ؟

چاند کی خاطر ضد نہیں کرتے، اے میرے اچھے انشاء چاند

“ابن انشاء”

………………………

حسن جاناں کی تعریف ممکن نہیں،

آفریں آفریں!!

تو بھی دیکھے اگر، تو کہے ہمنشیں،

آفریں آفریں!!

ایسا دیکھا نہیں، خوبصورت کوئی،

جسم جیسے اجنتا کی مورت کوئی،

جسم جیسے نگاہوں پہ جادو کوئی

جسم نغمہ کوئی، جسم خوشبو کوئی،

جسم جیسے مچلتی ہوئی راگنی،

جسم جیسے مہکتی ہوئ چاندنی،

جسم جیسے کہ کھلتا ہوا اک چمن،

جسم جیسے کہ سورج کی پہلی کرن،

جسم ترشا ہوا، دلکش و دلنشیں،

صندلیں صندلیں، مرمریں مرمریں،

آفریں آفریں!!

چہرہ اک پھول کی طرح شاداب ہے،

چہرہ اسکا ہے یا کوئی ما ہتاب ہے،

چہرہ جیسے غزل، جہرہ جانِ غزل،

چہرہ جیسے کلی، چہرہ جیسے کنول،

چہرہ جیسے تصور بھی، تصویر بھی،

چہرہ اک خواب بھی، چہرہ تعبیر بھی،

چہرہ کوئی الف لیلوی داستاں،

چہرہ اک پل یقیں، چہرہ اک پل گماں،

چہرہ جیسا کہ چہرہ کوئی نہیں،

ماہ رو ماہ رو، مہ جبیں، مہ جبیں،

آفریں آفریں!!

آنکھیں دیکھیں تو میں دیکھتا رہ گیا،

جام دو اور دونوں ہی دو آتشہ،

آنکھیں یا میکدے کے یہ دو باب ہیں،

آنکھیں ان کو کہوں یا کہوں خواب ہیں،

آنکھیں نیجی ہوئیں تو حیا بن گئیں،

آنکھیں اونچی ہوئیں تو دعا بن گئیں،

آنکھیں اٹھ کر جھکیں تو ادا بن گئیں،

آنکھیں جھک کر اٹھیں تو قضا بن گئیں،

آنکھیں جن میں ہیں قید آسمان و زمیں،

نرگسیں نرگسیں، سرمگیں سرمگیں،

آفریں آفریں!!

زلف جاناں کی بھی لمبی ہے داستاں،

زلف کی میرے دل پر ہیں پرچھائیاں،

زلف جیسے کہ امڈی ہوئی ہو گھٹا،

زلف جیسے کہ ہو کوئی کالی بلا،

زلف الجھے تو دنیا پریشان ہو،

زلف سلجھے تو یہ زیست آسان ہو،

زلف بکھرے سیاہ رات چھانے لگے،

زلف لہرائے تو رات جانے لگے،

زلف زنجیر ہے، پھر بھی کتنی حسیں،

ریشمیں ریشمیں، عنبریں عنبریں،

آفریں آفریں!!

جاوید اختر

۔۔۔۔۔۔۔۔۔۔۔۔۔

جب دہر کے غم سے اماں نہ ملی، ہم لوگوں نے عشق ایجاد کیا

کبھی شہر بتاں میں خراب پھرے، کبھی دشتِ جنوں آباد کیا

کبھی بستیاں بن، کبھی کوہ و دمن، رہا کتنے دنوں یہی جی کا چلن

جہاں حسن ملا وہاں بیٹھ رہے، جہاں پیار ملا وہاں صاد کیا

شبِ ماہ میں جب بھی یہ درد اٹھا، کبھی بیت کہے (لکھی چاند نگر)

کبھی کوہ سے جا سر پھوڑ مرے، کبھی قیس کو جا استاد کیا

یہی عشق بالآخر روگ بنا، کہ ہے چاہ کے ساتھ بجوگ بنا

جسے بننا تھا عیش وہ سوگ بنا، بڑا من کے نگر میں فساد کیا

اب قربت و صحبت یار کہاں، لب و عارض و زلف و کنار کہاں

اب اپنا بھی میر سا عالم ہے، ٹُک دیکھ لیا جی شاد کیا

شاعر : شیر محمد خان (ابن انشا)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اس میں کچھ آپکا بھی حصہ ھے

یہ جو پلکوں پہ نمی ھے صاحب

نہ آیا ہوں ۔۔۔۔۔۔ نہ میں لایا گیا ہوں

میں حرفِ کن ہوں ۔۔۔۔۔ فرمایا گیا ہوں

میری اپنی نہیں ہے کوئی صورت

ہر اِک صورت سے بہلایا گیا ہوں

بہت بدلے میرے انداز لیکن

جہاں کھویا ۔۔۔۔۔۔ وہیں پایا گیا ہوں

وجودِ غیر ہو کیسے گوارا

تیری راہوں میں بے سایا گیا ہوں

نجانے کون سی منزل ہے واصف

جہاں نہلا کے بلوایا گیا ہوں

واصف علی واصف

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شہزاد نیر

“ھر ایک گام پہ صدیاں نثار کرتے ھوئے

میں چل رھا تھا زمانے شمار کرتے ھوئے

یہی کُھلا کہ مسافر نے خود کو پار کیا

تری تلاش کے صحرا کو پار کرتے ھوئے

میں رشک ِ ریشہ ء گل تھا، بدل کے سنگ ھوا

بدن کو تیرے بدن کا حصار کرتے ھوئے

مجھے ضرور کنارے پکارتے ھوں گے

مگر میں سُن نہیں پایا ، پکار کرتے ھوئے

میں اضطراب ِ زمانہ سے بچ نکلتا ھوں

تمہارے قول کو دل کا قرار کرتے ھوئے

جہان ِ خواب کی منزل کبھی نہیں آئی

زمانے چلتے رھے ، انتظار کرتے ھوئے

میں راہ ِ سود و زیاں سے گزرتا جاتا ھوں

کبھی گریز کبھی اختیار کرتے ھوئے

نہیں گرا مری قاتل انا کا تاج محل

میں مر گیا ھوں خود اپنے پہ وار کرتے ھوئے

میں اور نیم دلی سے وفا کی راہ چلوں

میں اپنی جاں سے گزرتا ھوں پیار کرتے ھوئے

یقین چھوڑ کے نیر گُماں پکڑتا رھا

نگاہ ِ یار ترا اعتبار کرتے ھوئے

( شہزاد نیر )

مرے روگ کا نہ ملال کر مرے چارہ گر
میں بڑا ہوا اسے پال کر مرے چارہ گر
سبھی درد چُن مرے جسم سے ، کسی اسم سے
مرا انگ انگ بحال کر ، مرے چارہ گر
مجھے سی دے سوزن ِ درد ، رشتہ ء زرد سے
مجھے ضبط ِ غم سے بحال کر ، مرے چارہ گر
مجھے چیر نشتر ِعشق ، سوز ِ سرِشک سے
مرا اندمال محال کر ، مرے چارہ گر
یہ بدن کے عارضی گھاؤ ہیں ، انہیں چھوڑ دے
مرے زخم ِ دل کا خیال کر ، مرے چارہ گر
فقط ایک قطرہ ء اشک میرا علاج ھے
مجھے مُبتلائے ملال کر ، مرے چارہ گر
میں جہان درد میں کھو گیا ، تجھے کیا ملا
مجھے امتحان میں ڈال کر ، مرے چارہ گر
مجھے اپنے زخم کی خود بھی کوئی خبر نہیں
سو نہ مجھ سے کوئی سوال کر ، مرے چارہ گر
ترا حال دیکھ کے روئے گا ، ترا چارہ گر
مرا دل نہ دیکھ نکال کر ، مرے چارہ گر
شہزاد نیر

کس حقیقت کا انکشاف کیا
دل نے مجھ کو مرے خلاف کیا

میرے ہونے کا اعتراف کیا
مجھ سے جس نے بھی اختلاف کیا

تُو نے مجھ کو مُعاف کر ڈالا
میں نے خود کو نہیں مُعاف کیا

آنکھ میں گردِ خود نُمائی تھی
پھر مجھے آئنے نے صاف کیا

ایک صورت دکھائی دینے لگی
میں نے دل میں عجب شگاف کیا

ایک دُنیا تباہ کر ڈالی
ایک زرے نے انحراف کیا

مسجدوں میں تھے شور و شر نیر
میں نے صحرا میں اعتکاف کیا

شہزاد نیر
جمال ِ کم سخن سے ایسا کام کیسے ہو گیا

میں خوگر ِ کلام ، بے کلام کیسے ہو گیا

محبتوں کے سلسلے تمہی پہ کیسے رْک گۓ

مسافروں کا اِس گلی قیام کیسے ہو گیا

یہ لخت لخت روشنی تمیں کہاں سے مل گئ

کرن کرن کا رْخ پہ انتظام کیسے ہو گیا

جو خوۓ احتیاط پر تمہارا اختیار ہے

تو روۓ بے نیاز لالہ فام کیسے ہو گیا

تمام راستوں پہ وہ چلا قدم سنبھال کر

بدن کے راستے پہ بے لگام کیسے ہو گیا

سکوت کے سکون کی کمائ کیسے لْٹ گئ

سخن کا اضطراب میرے نام کیسے ہو گیا

“وحید و سعد” آئیو ، ارے مدد کو دوڑیو

میں غرق ِ صد سبو تھا،تشنہ کام کیسے ہو گیا

وہ دید ِ لا وجود کس نظر کی گھاٹ اْتر گئ

یہ عمر بھر کا کام تھا ، تمام کیسے ہوگیا

نہیں نہہیں کوئ نہیں،کوئ نہیں کہیں نہیں

گمان تھا !! یقین کا امام کیسے ہو گیا

زمیں کو جانتے ہوۓ ، فلک کو تانتے ہوۓ

میں آپ ہی امام تھا ، غلام کیسے ہو گیا

ضرور کچھ غلط لکھا گیا شرف کے باب میں

یہ زر کا انتظام ، احترام کیسے ہو گیا

یہ جْوۓ درد کس طرح زمین ِ جاں پہ بہہ پڑی

فصیل ِ ضبط ِ غم کا انہدام کیسے ہو گیا

شہزاد نیر

شکستہ چھت میں پرندوں کو جب ٹھکانہ ملا

میں خوش ہوا کہ مرے گھر کو بھی گھرانہ ملا

فلک پہ اڑتے ہوئے بھی نطر زمیں پہ رہی

مزاج مجھ کو مقدر سے طائرانہ ملا

ہم اس کے حسن _ سخن کی دلیل کیا دیں گے

وہ جتنی بار ملا ہم سے ، برملا نہ ملا

کسی کی دیکھتی آنکھیں بھی آس پاس رہیں

تجھے ملا تو بہ احساس _ مجرمانہ ملا

میں اپنی بات درختوں سے کہہ کے روتا ہوں

کہ میرے غم کو کسی رت نہ آشیانہ ملا

اب آ گیا ہے تو چپ چاپ خامشی کو سن

مرے سکوت میں اپنی کوئی صدا نہ ملا

لڑی سی ٹوٹ کے آنکھوں سے گر پڑی نیئر

لبوں سے حرف کا کوئی بھی  سلسلہ نہ ملا

( شہزاد نیر
….مرا نہیں تو وہ اپنا ھی کچھ خیال کرے
…..اُسے کہو کہ تعلق کو پھر بحال کرے
….ملے تو اتنی رعایت عطا کرے مجھ کو
…مرے جواب کو سُن کر کوئی سوال کرے
….کلام کر کہ مرے لفظ کو سہولت ھو
…..ترا سکوت مری گفتگو محال کرے
…..نہ گزرے وقت کا پوچھے نہ آنے والے کا
…..کوئی سوال کرے بھی تو حسب حال کرے
….وہ ھونٹ ھوں کہ تبسم، سکوت ھو کہ سُخن
…..ترا جمال ھر اک رنگ میں کمال کرے
….بلندیوں پہ کہاں تک تجھے تلاش کروں
…..ھر ایک سانس پہ عمر ِرواں زوال کرے
…..نگاہ ِیار نہ ھو تو نکھر نہیں پاتا
…..کوئی جمال کی جتنی بھی دیکھ بھال کرے
….میں اُس کا پھول ھوں نیر ! سو اُس پہ چھوڑ دیا
….وہ گیسوؤں میں سجائے کہ پائمال کرے
شہزاد نیر…

اب مسیحا کی احتیاج نہیں

کاہش_جاں کا کچھ علاج نہیں

جاں سے جانا روا رکھا اس نے

جا کے آنے کا کچھ رواج نہیں

زندگی منہ چھپا کے کیوں روئے

موت ہے اس کو کوئی لاج نہیں

سانس آتی نہیں ہے ، جاتی ہے

” ہاں ” کہو تو لگے گی آج ” نہیں”

بند آنکھوں سے اس نگر جانا

جس نگر پر نظر کا راج نہیں

کان میں شور سینہ کوبی کا

دل کی دھڑکن میں کوئی باج نہیں

ایسے دنیا کو چھوڑے جاتے ہو

جیسے دنیا سے کام کاج نہیں

بے بسی کے نوالے گن گن کر

وہ پکاری ، نہیں ٫ اناج نہیں

حوصلہ چاہئیے سماعت کو

سانس کی چیخ ہے کھماج نہیں

شہزاد نیر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رُکو تو تم کو بتائیں ، وُہ اِتنے نازُک ہیں

کلی اَکیلے اُٹھائیں ، وُہ اِتنے نازُک ہیں

طبیب نے کہا ، گر رَنگ گورا رَکھنا ہے

تو چاندنی سے بچائیں ، وُہ اِتنے نازُک ہیں

وُہ بادلوں پہ کمر سیدھی رَکھنے کو سوئیں

کرن کا تکیہ بنائیں ، وُہ اِتنے نازُک ہیں

وُہ نیند کے لیے شبنم کی قرص بھی صاحب

بغیر پانی نہ کھائیں ، وُہ اِتنے نازُک ہیں

بدن کو چومیں جو بادل تو غسل ہوتا ہے

دَھنک سے غازہ لگائیں ، وُہ اِتنے نازُک ہیں

وُہ دو قدم بھی چلیں پانی پہ تو چھالے دیکھ

گھٹائیں گود اُٹھائیں ، وُہ اِتنے نازُک ہیں

کلی چٹکنے کی گونجے صدا تو نازُک ہاتھ

حسین کانوں پہ لائیں ، وُہ اِتنے نازُک ہیں

پسینہ آئے تو دو تتلیاں قریب آ کر

پروں کو سُر میں ہلائیں ، وُہ اِتنے نازُک ہیں

ہَوائی بوسہ پری نے دِیا ، بنا ڈِمپل

خیال جسم دَبائیں ، وُہ اِتنے نازُک ہیں

وُہ گھپ اَندھیرے میں خیرہ نگاہ بیٹھے ہیں

اَب اور ہم کیا بجھائیں ، وُہ اِتنے نازُک ہیں

وُہ گیت گائیں تو ہونٹوں پہ نیل پڑ جائیں

سخن پہ پہرے بٹھائیں ، وُہ اِتنے نازُک ہیں

جناب کانٹا نہیں پنکھڑی چبھی ہے اُنہیں

گھٹا کی پالکی لائیں ، وُہ اِتنے نازُک ہیں

کبوتروں سے کراتے ہیں آپ جو جو کام

وُہ تتلیوں سے کرائیں ، وُہ اِتنے نازُک ہیں

وُہ پانچ خط لکھیں تو ’’شکریہ‘‘ کا لفظ بنے

ذِرا حساب لگائیں ، وُہ اِتنے نازُک ہیں

گواہی دینے وُہ جاتے تو ہیں پر اُن کی جگہ

قسم بھی لوگ اُٹھائیں ، وُہ اِتنے نازُک ہیں

ہر ایک کام کو ’’مختارِ خاص‘‘ رَکھتے ہیں

سو عشق خود نہ لڑائیں ، وُہ اِتنے نازُک ہیں

وُہ سانس لیتے ہیں تو اُس سے سانس چڑھتا ہے

سو رَقص کیسے دِکھائیں ، وُہ اِتنے نازُک ہیں

بس اِس دلیل پہ کرتے نہیں وُہ سالگرہ

کہ شمع کیسے بجھائیں ، وُہ اِتنے نازُک ہیں

اُتار دیتے ہیں بالائی سادہ پانی کی

پھر اُس میں پانی ملائیں ، وُہ اِتنے نازُک ہیں

وُہ سیر ، صبح کی کرتے ہیں خواب میں چل کر

وَزن کو سو کے گھٹائیں ، وُہ اِتنے نازُک ہیں

کلی کو سونگھیں تو خوشبو سے پیٹ بھر جائے

نہار منہ یہی کھائیں ، وُہ اِتنے نازُک ہیں

وَزن گھٹانے کا نسخہ بتائیں کانٹوں کو

پھر اُن کو چل کے دِکھائیں ، وُہ اِتنے نازُک ہیں

وُہ دَھڑکنوں کی دَھمک سے لرزنے لگتے ہیں

گلے سے کیسے لگائیں ، وُہ اِتنے نازُک ہیں

نزاکت ایسی کہ جگنو سے ہاتھ جل جائے

جلے پہ اَبر لگائیں ، وُہ اِتنے نازُک ہیں

حنا لگائیں تو ہاتھ اُن کے بھاری ہو جائیں

سو پاؤں پر نہ لگائیں ، وُہ اِتنے نازُک ہیں

وُہ تِل کے بوجھ سے بے ہوش ہو گئے اِک دِن

سہارا دے کے چلائیں ، وُہ اِتنے نازُک ہیں

کل اَپنے سائے سے وُہ اِلتماس کرتے تھے

مزید پاس نہ آئیں ، وُہ اِتنے نازُک ہیں

وُہ تھک کے چُور سے ہو جاتے ہیں خدارا اُنہیں

خیال میں بھی نہ لائیں ، وُہ اِتنے نازُک ہیں

شہزاد قیس

____________________________

کوئی حسرت بھی نہیں ، کوئی تمنا بھی نہیں

دل وہ آنسو جو کسی آنکھ سے چھلکا بھی نہیں

روٹھ کر بیٹھ گئ ہمت دشوار پسند

راہ میں اب کوئی جلتا ھوا صحرا بھی نہیں

آگے کچھ لوگ ھمیں دیکھ کے ھنس دیتے تھے

اب یہ عالم ھے کہ کوئی دیکھنے والا بھی نہیں

درد وہ آگ کہ بجھتی نہیں جلتی بھی نہیں

یاد وہ زخم کہ بھرتا نہیں ، رستا بھی نہیں

باد باں کھول کے بیٹھے ھیں سفینوں والے

پار اترنے کے لیے ہلکا سا جھونکا بھی نہیں

احمد راہی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آپ سُکھ سے ہیں ترکِ تعلق کے بعد

اتنی جلدی نہ یہ فیصلہ کیجیے

زندگی کٹ‌رہی ہے بڑے چین سے

اور غم ہوں تو وہ بھی عطا کیجیے

اور دنیا سے بھلائی کا کیا صلہ ملتا

آئینہ میں ںے دکھایا تھا کہ پتھر برسے

شکیب جلالی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کوئی فریاد ترے دل میں دبی ہو جیسے

تو نے آنکھوں سے کوئی بات کہی ہو جیسے

جاگتے جاگتے اک عمر کٹی ہو جیسے

جان باقی ہے مگر سانس رکی ہو جیسے

ہر ملاقات پہ محسوس یہی ہوتا ہے

مجھ سے کچھ تیری نظر پوچھ رہی ہو جیسے

راہ چلتے ہوئے اکثر یہ گماں ہوتا ہے

وہ نظر چھپ کے مجھے دیکھ رہی ہو جیسے

ایک لمحے میں سمٹ آیا صدیوں کا سفر

زندگی تیز بہت تیز چلی ہو جیسے

اس طرح پہروں تجھے سوچتا رہتا ہوں میں

میری ہر سانس ترے نام لکھی ہو جیسے

شاعر : جاوید اختر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جسم دمکتا ، زُلف گھنیری ، رنگیں لب ، آنکھیں جادو

سنگِ مرمر، اودا بادل ، سرخ شفق ، حیراں آہو

بھکشو دانی ، پیاسا پانی ، دریا ساگر ، جل گاگر

گلشن خوشبو ، کوئل کوکو، مستی دارو ،میں اور تو

بانبی ناگن ، چھایا آنگن ، گھنگرو چھن چھن ،آشا من

آنکھیں کاجل ، پربت بادل، وہ زُلفیں اور یا بازو

راتیں مہکی ،سانسیں دہکی ، نظریں بہکی ، رُت لہکی

سپن سلونا ، پریم کھیلونا ، پھول بچھونا ، وہ پہلو

تم سے دوری ، یہ مجبوری ، زخمِ کاری ، بیداری

تنہا راتیں ، سپنے کاتیں ، خود سے باتیں ، میری خُو

شاعر : جاوید اختر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ کون ہے دنیا میں جسے غم نہیں ہوتا
کس گھر میں خوشی ہوتی ہے ماتم نہیں ہوتا

تم جا کے چمن میں گل و بلبل کو تو دیکھو
کیا لطف تہ ِ چادرِ شبنم نہیں ہوتا

کیا سرمہ بھری آنکھوں سے آنسو نہیں گرتے
کیا مہندی لگے ہاتھوں سے ماتم نہیں ہوتا

کچھ اور ہی ہوتی ہیں بگڑنے کی ادائیں
بننے میں سنورنے میں یہ عالم نہیں ہوتا

مٹنتے ہوئے دیکھی ہے عجب حسن کی تصویر
اب کوئی مَرے مجھ کو ذرا غم نہیں ہوتا

کچھ بھی ہو ریاضؔ آنکھ میں آنسو نہیں آتے
مجھ کو تو کسی بات کا اب غم نہیں ہوتا

ریاضؔ خیرآبادی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ باتیں جھوٹی باتیں ہیں، یہ لوگوں نے پھیلائی ہیں
تم انشا جی کا نام نہ لو کیا انشا جی سودائی ہیں

ہیں لاکھوں روگ زمانے میں ، کیوں عشق ہے رسوا بیچارا
ہیں اور بھی وجہیں وحشت کی ، انسان کو رکھتیں دکھیارا
ہاں بے کل بےکل رہتا ہے ، ہو پیت میں جس نے جی ہارا
پر شام سے لے کر صبح تلک یوں کون پھرے گا آوارہ
یہ باتیں جھوٹی باتیں ہیں، یہ لوگوں نے پھیلائی ہیں
تم انشا جی کا نام نہ لو کیا انشا جی سودائی ہیں

یہ بات عجیب سناتے ہو ، وہ دنیا سے بے آس ہوئے
اک نام سنا اور غش کھایا ، اک ذکر پہ آپ اداس ہوئے
وہ علم میں افلاطون سنے، وہ شعر میں تلسی داس ہوئے
وہ تیس برس کے ہوتے ہیں ، وہ بی-اے،ایم-اے پاس ہوئے
یہ باتیں جھوٹی باتیں ہیں، یہ لوگوں نے پھیلائی ہیں
تم انشا جی کا نام نہ لو کیا انشا جی سودائی ہیں

گر عشق کیا ہے تب کیا ہے، کیوں شاد نہیں آباد نہیں
جو جان لیے بن ٹل نہ سکے ، یہ ایسی بھی افتاد نہیں
یہ بات تو تم بھی مانو گے، وہ قیس نہیں فرہاد نہیں
کیا ہجر کا دارو مشکل ہے؟ کیا وصل کے نسخے یاد نہیں؟
یہ باتیں جھوٹی باتیں ہیں، یہ لوگوں نے پھیلائی ہیں
تم انشا جی کا نام نہ لو کیا انشا جی سودائی ہیں

وہ لڑکی اچھی لڑکی ہے، تم نام نہ لو ہم جان گئے
وہ جس کے لانبے گیسو ہیں، پہچان گئے پہچان گئے
ہاں ساتھ ہمارے انشا بھی اس گھر میں تھے مہمان گئے
پر اس سے تو کچھ بات نہ کی، انجان رہے، انجان گئے
یہ باتیں جھوٹی باتیں ہیں، یہ لوگوں نے پھیلائی ہیں
تم انشا جی کا نام نہ لو کیا انشا جی سودائی ہیں

شاعر : ابنِ انشا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دیکھ ہمارے ماتھے پر یہ دشتِ طلب کی دھول میاں

ہم سے عجب ترا درد کا ناطہ ، دیکھ ہمیں مت بھول میاں

اہلِ وفا سے بات نہ کرنا ، ہو گا ترا اصول میاں

ہم کیوں چھوڑیں ان گلیوں کے پھیروں کا معمول میاں

یونہی تو نہیں دشت میں پہنچے ، یونہی تو نہیں جوگ لیا

بستی بستی کانٹے دیکھے ، جنگل جنگل پھول میاں

یہ تو کہو کبھی عشق کیا ہے؟ جگ میں ہوئے ہو رسوا بھی؟

اس کے سوا ہم کچھ بھی نہ پوچھیں ، باقی بات فضول میاں

نصب کریں محرابِ تمنا ، دیدہ و دل کو فرش کریں

سنتے ہیں وہ کوئے وفا میں آج کریں گے نزول میاں

سن تو لیا کسی نار کی خاطر کاٹا کوہ ، نکالی نہر

ایک ذرا سے قصے کو اب دیتے کیوں ہو طول میاں

کھیلنے دیں انہیں عشق کی بازی ، کھیلیں گے تو سیکھیں گے

قیس کی یا فرہاد کی خاطر کھولیں کیا سکول میاں

اب تو ہمیں منظور ہے یہ بھی ، شہر سے نکلیں ، رسوا ہوں

تجھ کو دیکھا ، باتیں کر لیں ، محنت ہوئی وصول میاں

انشاء جی کیا عذر ہے تم کو ، نقدِ دل و جاں نذر کروں

روپ نگر کے ناکے پر یہ لگتا ہے محصول میاں

شاعر : ابن انشاء

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں دہشت گرد تھا مرنے پہ بیٹا بول سکتا ہے

حکومت کے اشارے پہ تو مردہ بول سکتا ہے

یہاں پہ نفرتوں نے کیسے کیسے گُل کھلائے ہیں

لُٹی عصمت بتا دے گی دوپٹہ بول سکتا ہے

حکومت کی توجہ چاہتی ہے یہ جلی بستی

عدالت پوچھنا چاہے تو ملبہ بول سکتا ہے

کئی چہرے ابھی تک منہ زبانی یاد ہیں اُس کو

کہیں تم پوچھ مت لینایہ گونگا بول سکتا ہے

بہت سی کرسیاں اس ملک میں لاشوں پہ رکھی ہیں

یہ وہ سچ ہے جسے جھوٹے سے جھوٹا بول سکتا ہے

منور رانا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہنس کے بولا کرو بلایا کرو

آپ کا گھر ہے آیا جایا کرو

مسکراہٹ ہے حسن کا زیور

روپ بڑھتا ہے مسکرایا کرو

حد سے بڑھ کر حسین لگتے ہو

جھوٹی قسمیں ضرور کھایا کرو

حکم کرنا بھی ایک سخاوت ہے

ہم کو خدمت کوئی بتایا کرو

بات کرنا بھی بادشاہت ہے

بات کرنا نہ بھول جایا کرو

تا کہ دنیا کی دلکشی نہ گھٹے

نت نے پیرہن میں آیا کرو

کتنے سادہ مزاج ہو تم عدم

اس گلی میں بہت نہ جایا کرو

عبدالحمید عدم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ناصر کاظمی

دکھ کی لہر نے چھیڑا ھوگا

یاد نے کنکر پھینکا ھوگا

آج تو میرا دل کہتا ھے

تو اس وقت اکیلا ھوگا

میرے چومے ہوئے ہاتھوں سے

اوروں کو خط لکھتا ھوگا

بھیگ چلیں اب رات کی پلکیں

تو اب تھک کے سویا ھوگا

ریل کی گہری سیٹی سن کر

رات کا جنگل گونجا ھوگا

شہر کے خالی اسٹیشن پر

کوئی مسافر اترا ھوگا

آنگن میں پھر چڑیاں بولیں

تو اب سو کر اٹھا ھوگا

یادوں کی جلتی شبنم سے

پھول سا مکھڑا دھویا ھوگا

موتی جیسی شکل بنا کر

آئینے کو تکتا ھوگا

شام ہوئی اب تو بھی شاید

اپنے گھر کو لوٹا ھوگا

نیلی دھندلی خاموشی میں

تاروں کی دھن سنتا ھوگا

میرا ساتھی شام کا تارا

تجھ سے آنکھ ملاتا ھوگا

شام کے چلتے ہاتھ نے تجھ کو

میرا سلام تو بھیجا ھوگا

پیاسی کرلاتی کونجوں نے

میرا دکھ تو سنایا ھوگا

میں تو آج بہت رویا ھوں

تو بھی شاید رویا ھوگا

ناصر تیرا میت پرانا

تجھ کو یاد تو آتا ھوگا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نکل گئے ہیں خرد کی حدوں سے دیوانے

اب اہلِ ہوش سے کہہ دو نہ آئیں سمجھانے

بساطِ بزم الٹ کر کہاں گیا ساقی

فضا خموش ، سُبُو چپ ، اداس پیمانے

یہ کس کے غم نے دلوں کا قرار لُوٹ لیا

یہ کس کی یاد میں سر پھوڑتے ہیں دیوانے

بھری بہار کا منظر ابھی نگاہ میں تھا

مری نگاہ کو کیا ہوگیا خدا جانے

ہے کون بر لبِ ساحل ، کہ پیشوائی کو

قدم اُٹھائے بہ اندازِ موج ، دریا ، نے

تمام شہر میں اک درد آشنا نہ ملا

بسائے اِس لئے اہلِ جنوں نے ویرانے

نہ اب وہ جلوہ یوسف نہ مصر کا بازار

نہ اب وہ حسن کے تیور ، نہ اب وہ دیوانے

نہ حرفِ حق ، نہ وہ منصور کی زباں ، نہ وہ دار

نہ کربلا ، نہ وہ کٹتے سروں کے نذرانے

نہ بایزید ، نہ شبلی ، نہ اب جنید کوئی

نہ اب و سوز ، نہ آہیں ، نہ ہاوہو خانے

خیال و خواب کی صورت بکھر گیا ماضی

نہ سلسلے نہ وہ قصے نہ اب وہ افسانے

نہ قدر داں ، نہ کوئی ہم زباں ، نہ انساں دوست

فضائے شہر سے بہتر ہیں اب تو ویرانے

بدل گئے ہیں تقاضے مزاجِ وقت کے ساتھ

نہ وہ شراب ، نہ ساقی ، نہ اب وہ میخانے

تمام بند جُنوں توڑ بھی گیا ، لیکن

انا کے جال میں جکڑے ہوئے ہیں فرزانے

یہ انقلاب کہاں آسماں نے دیکھا تھا

الجھ رہے ہیں غمِ زندگی سے دیوانے

ہر ایک اپنے ہی سود و زیاں کی فکر میں ہے

کوئی تو ہو ، جو مرے دل کا درد پہچانے

ترا وجود غنیمت ہے پھر بھی اے ساقی!

کہ ہوگئے ہیں پھر آباد آج میخانے

وہی ہجوم ، وہی رونقیں ، وہی میکش

وہی نشہ ، وہی مستی ، وہی طرب خانے

جبیں کو در پہ ترے رکھ دیا یہی کہہ کر

یہ جانے اور ترا سنگِ آستاں جانے

اُٹھیں گے پی کے تری مے نواز آنکھوں سے

یہ طے کئے ہوئے بیٹھے ہیں آج دیوانے

ہے تیری ذات وہ اک شمعِ انجمن افروز

کہ جس کی لو پہ لپکتے رہیں گے پروانے

کوئی نشاط کا ساماں کوئی طرب کی سبیل

لگی ہے پھر سرِ میخانہ بدلیاں چھانے

تو بولتا ہے تو چلتی ہے نبضِ میخانہ

تو دیکھتا ہے تو کرتے ہیں رقص پروانے

یہ مستیاں نہیں جام و سُبو کے حصے میں

تیری نگاہ سے پتے ہیں تیرے دیوانے

نصیر ! اشک تو پلکوں پہ سب نے دیکھ لیے

گزر رہی ہے جو دل پر ، وہ کوئی کیا جانے

نصیر الدین نصیر

………………………

آئے کچھ ابر کچھ شراب آئے

اس کے بعد آئے جوعذاب آئے

بام ِ مينا سے ماہتاب اترے

دست ِ ساقي ميں آفتاب آئے

ہر رگ ِ خوں ميں پھر چراغاں ہو

سامنے پھر وہ بے نقاب آئے

عمر کے ہر ورق پہ دل کو نظر

تيري مہر و وفا کے باب آئے

کر رہا تھا غم ِ جہاں کا حساب

آج تم ياد بے حساب آئے

نہ گئي غم کي سرداري

دل ميں يوں روز انقلاب آئے

جل اٹھے بزم ِ غير کے در و بام

جب بھي ہم خانماں خراب آئے

اس طرح اپني خامشي گونجي

گويا ہر سمت سے جواب آئے

فيض تھي سر بسر منزل

ہم جہاں پہنچے کامياب آئے !!

………………………………..

شہروں ملکوں میں جو یہ میر کہاتا ہے میاں
دیدنی ہے پہ بہت کم نظر آتا ہے میاں

عالم آئینہ ہے جس کا وہ مصور بے مثل
ہائے کیا صورتیں پردے میں بناتا ہے میاں

قسمت اس بزم میں لائی کہ جہاں کا ساقی
دے ہے مے سب کو ہمیں زہر پلاتا ہے میاں

ہو کے عاشق ترے، جان و دل و دیں کھو بیٹھے
جیسا کرتا ہے کوئی ویسا ہی پاتا ہے میاں

حسن یک چیز ہے ہم ہوویں کہ تُو ہو ناصح
ایسی شے سے کوئی بھی ہاتھ اٹھاتا ہے میاں

جھگڑا اس حادثے کا کوہ گراں سنگ کو بھی
جوں پرِ کاہ اڑا ہی لیے جاتا ہے میاں

کیا پری خوں ہے جو راتوں کو جگاوے ہے میر
شام سے دل، جگر و جان جلاتا ہے میاں

کلام : میر تقی میر
آواز : مہدی حسن

…………………………………………..